Oferta formativa
Vigulín
Al rau les corrientes pedagóxiques más modernes qu’imperen nel norte d’Europa, apuesta pola clase colectiva en grupu pequeñu, buscando la participación activa del alumnáu dende’l primer momentu, y fomentando con ello’l desarrollu de roles grupales, la responsabilidá y l’arriquecimientu musical mutúu, ensin desdexar l’atención personalizada del que tien falta’l deprendimientu del instrumentu nos anicios.
Impártense clases d’adultos y de neños usando materiales didácticos adaptaos y d’elaboración propio que permiten la práctica acompañaos del profesor nel aula, y de grabaciones en casa, evitando la monotonía y desasosiegu que produz la práctica en solitariu.
Tamién hai la posibilidá d’asistir de manera individualizada pa los alumnos avanzaos o que vienen d’otros estilos musicales y quieran adquirir nociones y técniques propies del estilu.
Los conteníos toquen la música tradicional asturiana y del arcu atlánticu en xeneral, les sos característiques, los ritmos y les sos técniques d’arcu y ornamentales.
Bárbara González-Quevedo Pedrayes
Bárbara entamó a tocar el vigulín con 9 años na Escuela de Música Divertimento n’Uviéu, continuando dempués los sos estudios d’esti instrumentu nel Conservatoriu Profesional de Música d’Uviéu “Anselmo González del Valle”. Dempués d’eso, siguió formándose gracies a varios cursos de distintos estilos musicales, ente ellos de música tradicional asturiana y d’otres zones del Arcu Atlánticu col vigulineru asturianu Lisardo Prieto (Felpeyu, N’Arba, etc.) na Escuela de Música La Quintana.
Toca’l vigulín y canta nel grupu folk Alienda dende l’entamu del mesmu en 2013 y tamién nel grupu Muyeres dende 2014.