
Oferta formativa
Gaita, whistle y travesera
Anque’l procesu de formación de los futuros gaiteros va ser muy flesible, en xeneral va dividise en 6 niveles o etapes. Esto nun quier dicir que tenga d’axustase a 6 cursos académicos, porque al tratase d’una enseñanza individualizada, el ritmu de deprendimientu afáyase a les circunstancies personales de cada alumnu, acordies a la so edá y conocimientos musicales previos.
El Nivel 0 supón el primer contactu cola dixitación de la gaita, y tá diseñáu especialmente pa los alumnos más mozos (d’unos 7-8 años) mentes que al algamar el Nivel 5, l’alumnu va enfilar el repertoriu de gaiteru solista. En tolos niveles va dase una importancia especial a l’afinación y al ritmu. Van deprendese técniques d’ornamentación y va tocase la escala cromática al traviés de delles tonalidaes, abarcando tola tesitura del instrumentu. Tamién van enxertase técniques d’acompañamientu de canción asturiana y llabores de caltenimientu del instrumentu. Dende los niveles iniciales, pondráse enfotu na interpretación grupal en forma de banda, bandina o pareyas instrumental.
Al los postrero del procesu, l’alumnu van cuntar coles ferramientes técniques abondes pa la creación del so estilu propiu d’interpretación personal.
Dani Álvarez
Entama a tocar la gaita con 7 años de la mano del mayestru gaiteru José Ángel Hevia, compaxinando los estudios de clarinete na Escuela Municipal de Música de Mieres. Pertenez durante años a la Banda Gaites Mieres del Camín, una de les que conformen La Bandona d’Asturies. Namás con 13 años, nel añu 1996, algama’l 3er puestu nel Memorial Remis Ovalle, lo que lu lleva a participar nel prestixosu troféu Macallan nel Festival interceltique de Lorient, onde se proclama subcampeón. Nel 2008 fina los sos estudios reglaos nel Conservatoriu “Valle del Nalón”, pola especialidá de flauta travesera. Non conforme y de mena autodidauta, perfeciona’l so manexu d’instrumentos como la Uilleann pipe (Gaita irlandesa), la flauta de madera, el bouzouki, la guitarra acústica n’afinación DADGAD y delles percusiones. Tien pertenecío como miembru activu y collaborao con grupos de toa clas, dende’l propiu folk, la música clásica, hasta’l “Rock-Ska”, destacando la so vinculación col Grupu Folk Corquiéu; asina mesmo grabó en más de 50 trabayos discográficos de dellos artistes d’Asturies, Cantabria y Galicia. Nel añu 2009 gana’l premiu AMAS na categoría d’otros instrumentos. Pel llau más tradicional, pon clas dende l’añu 2005 en varies actividaes extraescolares, cursos, talleres y Escueles de Música Tradicional d’Asturies. Dende l’añu 2017 a 2021, foi direutor musical de la Banda Gaites Villaviciosa “El Gaitero”. Nesti 2021 ta acabante finar el Grau Profesional de gaita nel Conservatoriu “Anselmo González del Valle” d’Uviéu, llevando’l premiu fin de grau.
Más info na web de Dani Álvarez