Oferta formativa
Curdión diatónicu
Partiendo d’un averamientu y un grau inicial, que favoreza’l progresu pedagóxicu, va trabayase col oxetivu principal de que l’alumnáu adquiera un interés pol curdión de botonera, valorando la música tamién como mediu d’espresión cultural y social, impulsando el disfrute cola interpretación y potenciando la conocencia del patrimoniu musical d’Asturies.
Al traviés de clases individuales semanales, personalizaes, con llinguaxe musical y notación especifica, nes que nun ye torga la edá nin la falta de conocimientu previu, contribuyirase a desendolcar nel alumnáu la capacidá de conocer les característiques y posibilidaes sonores del instrumentu, no que cinca al repertoriu, afinación, morfoloxía, caltenimientu, hestoria, sonoridaes, control mecánicu, dinámiques, armonía, etc.
Tres d’algamar niveles medios y avanzaos, dirán adaptándose los estudios con dificultá progresiva, que favorezan l’avance adecuáu en función de la capacidad técnica, ya’l interés de l’alumnáu.
David Varela
David Varela entama de neñu col Llinguaxe Musical y Cantu, nos cursos del antiguu Atenéu Obreru de La Calzada (Xixón). Dada la so rellación familiar cola música tradicional asturiana, fórmase en percusión tradicional, tambor asturianu y acordión diatónicu, de manera autodidacta nos empiezos y yá con posterioridá, con mayestros avezaos y en cursos especializaos.
Foi fundador del grupu folk Llaímo y darréu formó parte de La Bandina, Lliberdón, Folkgando, Muyeres, Merlín, El Koku la Mazana, El Tambor de L’ Abadía, B.G. La Viga Travesá, ente munchos otros.
El so nome apaez en casi un centenar de trabayos discográficos ya collaboraciones en dellos estilos musicales y teatrales.
Tien una notoria reconocencia en premios y concursos (Amuesa de Folclor Ciudá d’Uviéu, I Trophèe Internacional Honner de Accordeón-Lorient 2006, Premios Oh! de Teatru, ente otros).
Pola so amplia conocencia de los ritmos tradicionales asturianos, ta rellacionáu con múltitú bandes de gaites y grupos d’investigación etnográfica y folclórica.
Anguañu ye integrante del grupu La Bonturné y apocayá formó parte de la banda qu’acompaña al grupu de pop, Pauline en La Playa y a la cantante Marisa Valle Roso.
Dende va décades, ye mayestru d’Acordión Diatónicu, Percusión Tradicional, Tambor Asturianu y Bodhram nes escueles de música tradicional “La Quintana” de Xixón y “A Mansalva” en Llaviana, nes Escueles Municipales de Música de Tinéu, Cangas y Nava, na que tamién foi Director. Collabora davezu con otres entidaes y academies como Sonidópolis, Ars Nova, Escontra’l Raigañu, Excelsior de La Pedrera, etc.
Como artesanu musical, trabaya dende va años na construción y arreglu d’instrumentos de percusión; especialmente tambores asturianos.
Como músicu y actor, tamién trabayó en numberoses produciones de teatru y video pa Javier Lueje, Compañía La Cuervo Teatru, Factoría Norte Teatru, Nun Tris, Teatru Margen, etc.
Nos caberos años, collabora tamién con una pequena seción semanal nel programa “La radio es mía” de la RPA.